1ܡܐܵܕܝܼܵܐ؛ ܐܵܚܘܿܢ̈ܘܵܬܲܢ؛ ܨܵܠܹܡܘܿܢ ܡܒܵܕܵܠ ܕܝܼܲܢ؛ ܕܗܹܡܸܙܡܵܢ ܕܡܵܪܲܢ ܗܵܘܝܵܐ ܒܸܪܚܵܛܵܐ ܘܦܵܝܫܵܐ ܚܩܝܼܪܬܵܐ ܐܲܝܟܼ ܕܐܘܼܦ ܠܟܸܣܠܵܘܟܼܘܿܢ. 2ܘܕܦܵܝܫܵܚ ܦܘܼܨܝܹܐ ܡ̣ܢ ܒܢܲܝ̈ܢܵܫܵܐ ܦܟ̰ܝܼ̈ܠܹܐ ܘܒܝܼܫܹ̈ܐ؛ ܣܵܒܵܒ ܗܲܝܡܵܢܘܼܬܵܐ ܠܹܐ ܝَܠܵܗ̇ ܕܟܠ ܐ݇ܢܵܫܵܐ. 3ܡܗܘܼܡܢܵܐ ܝܠܹܗ ܡܵܪܝܵܐ؛ ܗ̇ܘ ܕܒܸܬ ܡܲܩܘܹܐ ܠܵܘܟܼܘܿܢ؛ ܘܢܵܛܸܪܵܘܟܼܘܿܢ ܡ̣ܢ ܒܝܼܫܵܐ. 4ܐܝܼܢܵܐ ܚܵܬܸܪܓ̰ܲܡܥ ܝܼܘܵܚ ܡܸܢܵܘܟܼܘܿܢ ܓܹܒܵܐ ܒܡܵܪܲܢ؛ ܕܡܸܢܕܝܼ ܕܦܵܩܘܿܕܹܐ ܝܘܵܚ ܐܸܠܵܘܟܼܘܿܢ ܟܹܐ ܥܵܒܼܕܝܼܬܘܿܢ؛ ܐܘܼܦ ܒܸܬ ܥܵܒܼܕܝܼܬܘܿܢ. 5ܘܡܵܪܲܢ ܬܲܓܒܸܪ ܠܸܒܵܘܵܬܵܘ̈ܟܼܘܿܢ ܠܚܘܼܒܹܗ ܕܐܲܠܵܗܵܐ؛ ܘܠܚܡܵܠܬܵܐ ܕܡܫܝܼܚܵܐ. 6ܐܝܼܢܵܐ ܦܵܩܘܿܕܹܐ ܝܘܵܚ ܐܸܠܵܘܟܼܘܿܢ؛ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܕܗܵܘܝܼܬܘܿܢ ܦܪܝܼܩܹܐ ܡ̣ܢ ܟܠ ܐܵܚܘܿܢܵܐ ܗ̇ܘ ܕܒܹܐ ܪܹܐܙܵܐ ܚܵܕܸܪ؛ ܘܠܵܐ ܐܲܝܟܼ ܣܵܦܝܵܢܘܼܬܵܐ ܕܩܘܼܒܸܠܹܗ ܡܸܢܲܢ. 7ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܠܸܦܝܵܫܵܐ ܕܘܼܡܝܹܐ ܒܝܼܲܢ؛ ܕܠܵܐ ܚܕܸܪܲܢ ܒܹܐ ܪܹܐܙܵܐ ܓܵܘܵܘܟܼܘܿܢ. 8ܐܘܼܦ ܠܲܚܡܵܐ ܚܘܼܪܵܝܝܼ ܠܵܐ ܐَܟܼܸܠܲܢ ܡ̣ܢ ܐ݇ܢܵܫܵܐ؛ ܐܸܠܵܐ ܒܓ̰ܵܦܵܐ ܘܒܓ̰ܵܗ݇ܝܬܵܐ؛ ܒܠܲܝܠܹܐ ܘܒܐܝܼܡܵܡܵܐ ܦܠܸܚܠܲܢ؛ ܕܥܲܠ ܐ݇ܢܵܫܵܐ ܡܸܢܵܘܟܼܘܿܢ ܠܵܐ ܥܵܒܼܕܵܚ ܗ݇ܘܵܘ ܝܘܼܩܪܵܐ؛ 9ܠܵܐ ܣܵܒܵܒ ܕܠܲܝܬ ܠܲܢ ܗܘܼܟܡܵܐ؛ ܐܸܠܵܐ ܕܒܓܵܢܲܢ ܝܵܗ݇ܒܼܵܚ ܠܵܘܟܼܘܿܢ ܛܘܼܦ̮ܣܵܐ؛ ܕܒܝܼܲܢ ܦܵܝܫܝܼܬܘܿܢ ܕܘܼܡܝܹܐ. 10ܣܵܒܵܒ ܐܘܼܦ ܟܲܕ ܠܟܸܣܠܵܘܟܼܘܿܢ ܝܼܘܵܚ ܗ݇ܘܵܘ؛ ܐܵܗܵܐ ܦܩܸܕܠܲܢ ܐܸܠܵܘܟܼܘܿܢ؛ ܕܐܸܢ ܐ݇ܢܵܫܵܐ ܠܵܐ ܒܵܣܡܵܐ ܠܹܗ ܕܦܵܠܸܚ؛ ܐܘܼܦ ܠܵܐ ܐܵܟܼܸܠ. 11ܣܵܒܵܒ ܒܸܫܡܲܥܝܵܐ ܝܘܵܚ ܕܐܝܼܬ ܓܵܘܵܘܟܼܘܿܢ ܐ݇ܢܵܫܹ̈ܐ ܕܒܸܚܕܵܪܵܐ ܝܢܵܐ ܒܹܐ ܪܹܐܙܵܐ؛ ܘܗܲܪ ܠܹܐ ܝܢܵܐ ܒܸܦܠܵܚܵܐ؛ ܐܸܠܵܐ ܚܵܒܼܛܵܢܹ̈ܐ ܝܢܵܐ ܒܫܘܼܠܹ̈ܐ ܒܵܛܝܼܠܹ̈ܐ. 12ܐܝܼܢܵܐ ܗܲܪ ܠܐܲܢܹܐ ܦܵܩܘܿܕܹܐ ܝܘܵܚ؛ ܘܦܲܪܦܘܼܠܹܐ ܝܘܵܚ ܒܝܼܵܝܗܝ ܒܡܵܪܲܢ ܝܼܫܘܿܥ ܡܫܝܼܚܵܐ؛ ܕܒܢܝܼܚܘܼܬܵܐ ܗܵܘܝܼ ܒܸܦܠܵܚܵܐ ܘܒܹܐܟܼܵܠܵܐ ܠܲܚܡܵܐ ܕܓܵܢܵܝܗܝ. 13ܐܝܼܢܵܐ ܐܲܚܬܘܿܢ؛ ܐܵܚܘܿܢܘܵܬܝܼ̈؛ ܠܵܐ ܣܵܩܕܝܼܬܘܿܢ ܡ̣ܢ ܠܸܥܒܼܵܕܵܐ ܡܸܢܕܝܼ ܕܝܼܠܹܗ ܨܦܵܝܝܼ. 14ܘܐܸܢ ܐ݇ܢܵܫܵܐ ܠܵܐ ܡܲܨܝܸܬ ܠܗܹܡܸܙ̈ܡܵܢܲܢ؛ ܐܲܢܹܐ ܕܓܵܘ ܐܸܓܲܪܬܵܐ؛ ܡܚܹܡܘܿܢ ܠܹܗ ܢܝܼܫܲܢܩܵܐ؛ ܘܠܵܐ ܚܵܒܼܛܝܼܬܘܿܢ ܥܲܡܹܗ؛ ܕܢܵܚܸܦ. 15ܐܝܼܢܵܐ ܠܵܐ ܕܵܒܼܩܝܼܬܘܿܢ ܠܹܗ ܐܲܝܟܼ ܕܸܫ̰ܡܸܢ؛ ܐܸܠܵܐ ܗܵܘܝܼܬܘܿܢ ܒܝܼܵܗ݇ܒܼܘܼܗܝ ܢܲܨܝܼܗܲܬ ܐܲܝܟܼ ܕܠܐܵܚܘܿܢܵܐ. 16ܘܡܵܪܹܗ ܕܫܠܵܡܵܐ ܒܓܵܢܹܗ ܝܵܗ݇ܒܸܠ ܠܵܘܟܼܘܿܢ ܫܠܵܡܵܐ؛ ܒܟܠ ܙܲܒܼܢܵܐ ܒܟܠ ܬܵܗܵܪ. ܡܵܪܲܢ ܥܲܡ ܟܠܵܘܟܼܘܿܢ. 17ܫܠܵܡܵܐ ܒܐܝܼܕܵܐ ܕܝܼܝܼ ܦܵܘܠܘܿܣ؛ ܕܝܼܠܹܗ ܢܝܼܫܲܢܩܵܐ ܕܒܟܠܵܝܗܝ ܐܸܓܪ̈ܝܵܬܝܼ؛ ܗܲܕܟܼܵܐ ܒܸܟܬܵܒܼܵܐ ܝܘܸܢ. 18ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟܼܘܿܢ؛ ܐܵܡܹܝܢ.